Boeing 787

El Boeing 787, moteyáu «Dreamliner», ye un avión de pasaxeros de tamañu mediu y fuselaxe anchu desenvueltu pol fabricante estauxunidense Boeing Commercial Airplanes. L'aeronave, de doble pasiellu, puede tresportar ente 217 y 323 pasaxeros, dependiendo del tipu (787-8, -9 o -10). El so primer vuelu tuvo llugar el 19 d'avientu de 2009. El 787 ye capaz d'apurrir l'autonomía de vuelu de los aviones de gran tamañu a los reactores de tamañu mediu, y apurre a les llinies aérees una eficiencia ensin precedentes tocantes a consumu de combustible, colos consiguientes beneficios pal mediu ambiente. Consume un 20 % menos de combustible que cualesquier otru avión del so tamañu en misiones similares. Ye de destacar el significativu amenorgamientu nel so pesu total, pol usu de materiales compuestos na mayoría de la so construcción: como referencia, el Boeing 787 pesa ente 13 600 y 18 150 kg menos que l'Airbus A330-200. El nuevu avión viaxa a una velocidá asemeyada a la de los actuales aviones comerciales más rápidos, ye dicir Mach 0,85 (957 km/h). Boeing escoyó a General Electric y Rolls-Royce pa desenvolver los motores pal nuevu avión. Antes del 28 de xineru de 2005 el 787 yera conocíu cola designación de desenvolvimientu 7Y7. El 26 d'abril de 2005, un día y un añu dempués del llanzamientu del programa, l'apariencia final del diseñu esterior del 787 foi afitada. Con una ñariz menos atrevida y una cola más convencional, el diseñu final tien una aerodinámica cimera.